संविधानमै त्रुटि भएकोले प्रधानमन्त्रीले प्रदेश सभा विघटन नगर्लान भन्न सकिन्न : महन्थ ठाकुर

२०७७ पुष २६ गते, आईतवार

पुस २६, काठमाडौं । जनता समाजवादी पार्टी, नेपाल ९जसपा०का अध्यक्ष महन्थ ठाकुरले संविधानमै त्रुटि भएका कारण विवाद हुने गरेको बताएका छन।
आइतबार भैरहवामा आयोजित पत्रकार सम्मेलनमा अध्यक्ष ठाकुरले संविधानमा कस्तो त्रुटि छ भन्नेबारे नखुलाए पनि संसद विघटन गर्दा प्रधानमन्त्री केपी शर्मा ओलीले उल्लेख गरेका संविधानका धारा विवादास्पद भएको दावी गरे।

उनले संविधान अपूरो भयो भनेर आफूहरुले पहिल्यैदेखि भन्दै आएको र संविधान बनाउने सत्ताधारीहरुले नै अहिले संविधानमाथि विवाद निकालेको बताए।
ठाकुरले प्रदेशहरुमा धमाधम अविश्वासको प्रस्ताव आइरहेको र प्रधानमन्त्रीले प्रदेश पनि विघटन नगर्लान भनेर भन्न नसकिने बताए।

अध्यक्ष ठाकुरले संसद विघटन असंवैधानिक भएको जनाउँदै त्यसविरुद्ध पार्टीले आन्दोलन गरिरहेको र आउने दिनमा पनि त्यसलाई निरन्तरता दिने जानकारी दिए।
ठाकुरले संसद विघटन सम्बन्धी मुद्दा अदालतमा विचाराधीन रहेको र सर्वोच्चको फैसला आफूहरुलाई मान्य हुने बताए ।

2021 Copyrights Reserved @ CNN EXPRESS

Designed & Developed By:Web House Nepal