लयमा फर्कने प्रयत्नमा शैक्षिक क्षेत्र, उच्च शिक्षाका शैक्षिक गतिविधि चलायमान हुँदै

२०७७ पुष २८ गते, मंगलवार

पुस २८, काठमाडौं । कोरोना महामारी कम हुँदै गए पनि शिक्षा क्षेत्रका कतिपय समस्याले अझै निकास पाउन सकेको छैन । ८० लाखभन्दा बढी बालबालिका अध्ययन गर्ने विद्यालय तहका विद्यालय खोल्ने कि नखोल्ने, शैक्षिक सत्र कहिले सुरु र अन्त्य गर्ने तथा कक्षा ११ मा नयाँ पाठ्यक्रम पढाउने कि पुरानो भन्ने विषयले शिक्षा क्षेत्र लामो समयदेखि तरङ्गित छ । तुलनात्मक रूपमा उच्च शिक्षाका शैक्षिक गतिविधि भने चलायमान हुँदै पुरानै लयमा फर्कन थालेका छन् ।

कोरोना भाइरसपछि गत चैत महिनादखि नेपालका विद्यालय सञ्चालनमा आउन सकेका छैनन् । यस विषयमा शिक्षा, विज्ञान तथा प्रविधि मन्त्रालयले यसअघि विद्यालय पुनः सञ्चालनसम्बन्धी कार्यढाँचा सार्वजनिक गर्दै स्थानीय तहसँगको समन्वयमा विद्यालय सञ्चालनको अधिकार दिनुका साथै सङ्क्रमण बढेको अवस्थामा बन्द गर्ने अधिकारसमेत स्थानीय तहलाई नै दिइसकेको भए पनि केही स्थानबाहेक विद्यालय सहज तवरले खुलेका छैनन् ।

यो अवस्थामा सरकारले फेरि विद्यालय खोल्ने, नखोल्ने र त्यस विषयमा निर्णय गर्ने या नगर्ने विषयमा शिक्षा, विज्ञान तथा प्रविधि मन्त्रालयका अधिकारीहरूले स्पष्ट भन्न सकेका छैनन् । राष्ट्रिय निजी तथा आवासीय विद्यालय एसोसिएसन नेपाल ९एन प्याब्सन०का अध्यक्ष ऋतु सापकोटा मङ्सिरबाट काठमाडौँ उपत्यकाबाहिरका धेरै विद्यालय सञ्चालनमा आएको बताउनुभयो । काठमाडौँ उपत्यकामै बरु समस्या भएको उनको भनाइ छ ।

काठमाडौँ महानगरपालिकाले भौतिक रूपमा विद्यालय सञ्चालन गर्न अनुमति दिएको छैन । माघको पहिलो साताबाट विद्यालय सञ्चालनमा ल्याउने तयारी महानगरको छ । ललितपुर महानगरपालिकाले सञ्चालन गर्न अनुमति दिएको छ । अन्य नगरपालिकाले विद्यालय खोल्ने अनुमति दिए पनि चिसो तथा कोरोना जोखिमका कारण सञ्चालनमा आउन नसकेको पाइएको छ । यो समाचार आजको गोरखापत्र दैनिकमा प्रकाशित छ ।

2021 Copyrights Reserved @ CNN EXPRESS

Designed & Developed By:Web House Nepal