महाशिवरात्रि मनाउन पशुपतिनाथ मन्दिरमा आएका साधुसन्तलाई दक्षिणासहित बिदाइ

२०७७ चैत्र १ गते, आईतवार

चैत्र १, काठमाडौं । महाशिवरात्रिका अवसरमा पशुपतिनाथ मन्दिरमा दर्शन गर्न आएका साधुसन्तलाई दक्षिणासहित बिदाइ गरिएको छ । गुठी संस्थान र पशुपति क्षेत्र विकास कोषले छुट्टाछुट्टै दक्षिणासहित साधुसन्तलाई बिदाइ गरेका हुन् । संस्थानले साधुसन्तलाई छ वर्गमा विभाजन गरी दक्षिणासहित बिदाइ गरेको छ ।

९५१ रुपैयाँ, ७५१ रुपैयाँ, ५५१ रुपैयाँ, ३५१ रुपैयाँ, २५१ र १५१ रुपैयाँ गरी छ वर्गमा विभाजन गरिएका दुई हजार साधुसन्तलाई दक्षिणासहित शनिवार बिदाइ गरिएको हो । बाँकी साधुसन्तलाई आज पनि दक्षिणासहित बिदाइ गरिने जनाइएको छ । नागाबाबालाई भने दक्षिणासहित २०० ग्राम र १०० ग्रामको पेडासहित बिदाइ गरिएको छ । वरिष्ठ नागाबाबालाई २०० ग्राम र कनिष्ठ नागाबाबालाई १०० ग्रामको पेडासहित बिदाई गर्ने परम्परा छ । यस वर्ष पशुपति क्षेत्रमा १०० जना नागाबाबा आएको संस्थानले जनाएको छ ।

दक्षिणासँगै राष्ट्रपति विद्यादेवी भण्डारीले फागुन कृष्ण एकादशीका दिन शीतलनिवासमा सङ्कल्प गरेको सामग्रीसमेत वितरण गरिएको छ । पशुपतिमा आउने साधुसन्तलाई फागुन कृष्ण एकादशीदेखि औँसीसम्म संस्थानले खाने, बस्ने, धुनी जगाउने व्यवस्था गर्ने प्राचीनकालदेखिको परम्परा छ । यसैबीच, पशुपति क्षेत्र विकास कोषले पनि महाशिवरात्रि मनाउन आएका साधुसन्तलाई दक्षिणासहित बिदाइ गरेको जनाएको छ । रासस

2021 Copyrights Reserved @ CNN EXPRESS

Designed & Developed By:Web House Nepal