इङ्ग्ल्याण्डलाई हराउँदै इटली “युरो कप २०२० को” च्याम्पियन

२०७८ असार २८ गते, सोमबार

असार २८, काठमाडौं । यूईएफए युरो कप अन्तर्गत आज सम्पन्न फाइनल खेलमा इङ्ग्ल्याण्डलाई हराउँदै इटली च्याम्पियन बनेको छ। लण्डनस्थित वेम्बली स्टेडियममा सम्पन्न खेलमा पेनाल्टी सुटआउटमा जित निकाल्दै इटली च्याम्पियन बनेको हो। खेलको दोस्रो मिनेटमा नै किइरन ट्रिपिअरको पासमा लुक शले गोल गर्दै खेलमा अग्रता दिलाएका थिए। पहिलो हाफमा इङ्ग्याण्डले अग्रता बनाए पनि दोस्रो हाफमा इटलीले पुनरागमन गर्दै खेल बराबरीमा ल्याएको थियो। इटलीका लागि लिओनार्दो बोनुचीले ६७ औं मिनेटमा गोल गर्दै खेल बराबरीमा ल्याएका थिए।

निर्धारित समयसम्म खेल १-१ को बराबरीमा रोकिए पछि फाइनल खेल अतिरिक्त समय थप गरीएको थियो। यद्यपि अतिरिक्त समयमा पनि दुबै पक्षले गोल गर्न नसक्दा खेल पेनाल्टी सुटआउटमा पुगेको थियो। पेनाल्टीमा इटलीले ३-२ गोलअन्तरले जित निकाल्यो। इङ्ग्ल्याण्डका मार्कस रासफोर्ड, जोर्डन साञ्चो र बुकायो साका पेनाल्टीमा चुकेका थिए। योसँगै पहिलो पटक युरो कपको फाइनलमा पुगेको इङ्ग्लाण्ड युरोपियन च्याम्पियन हुन चुकेको छ भने इटलीले दोस्रो पटक युरो कपको उपाधि जितेको छ।

2021 Copyrights Reserved @ CNN EXPRESS

Designed & Developed By:Web House Nepal